歐聯英超四強仍佔優

足球「歐聯」確實引人入勝，未到最後一刻未知鹿死誰手？好以上屆決賽，車路士本來可穩操勝券，可惜車仔教練格蘭過份保守，在下半場曼聯無氣時，未能及時換出強手攻堅，幾次錯失良機，沒把曼聯絞殺，換來最終似曾相識的結局，十二碼決生死也峰迴路轉先威後死，曼聯有運贏得比賽。今季歐聯重啟戰鼓，分組也只打了兩場，雖然出線還有排睇，但也可分析一下，作過前瞻，好為日後「馬後炮」笑談。羅馬雖然首場作客負克盧日1比2，但本身是實力球隊仍可回旋。不萊梅攻力有信心，在德甲聯連拜仁照炒可也，不容忽視。薩克達及辛尼特係近年冒起?東歐勁旅，而士砵亭雖然老牌但已走下坡。祖記重返歐聯寄望甚欣。首仗小勝仍不要掉以輕心。馬體會、維拉里爾、費倫天拿及波圖都算打得球隊，入次圈不難。拜仁呢圈出線應沒問題，但好海鮮波，成日走樣要小心。阿仙奴及皇馬好睇唔好食，八強應有一席。巴賽分崩離析，美斯能否單天作保，近況已不看好，奪標應是奢望。至於奪標一族仍要首選車仔、曼聯、利記及國米，原因何在，有好球員，有好教練，兼且又增了兵，戈利斯馬及貝碧托夫應是亮點，史高拉利和摩連奴指指點點，你話好唔好睇。以下是今次分組賽我的一二名順序首選：A組為車仔、羅馬，Ｂ組為國米、不萊梅、Ｃ組為巴賽、薩克達，Ｄ組為利物甫、馬體會，Ｅ組為曼聯、維拉里爾，Ｆ組為拜仁、費倫天拿，Ｇ組為波圖、阿仙奴，Ｈ組為皇馬、祖記。撰文：浪子生